དེ་ཡང་རྫོགས་ཆེན་སྐུ་ཕྲེང་ལྔ་པ་ཐུབ་བསྟན་ཆོས་ཀྱི་རྡོ་རྗེའི་ལུང་བསྟན་ལས།
གནས་མཆོག་སྤོ་བོ་སྟོད་ཀྱི་ཕྱོགས་ཤིག་ན།།
རིན་ཆེན་བྲག་རི་ལྷུན་སྟུག་མཛེས་པའི་རྩར།།
ལྗོན་ཤིང་སྣ་ཚོགས་མཚོ་དང་ལྡེང་ཀས་བརྒྱན།།
བསིལ་ལྡན་ཆུ་བོ་ཆེན་པོ་ལྷོ་ནས་འདྲེན།།
ཐབས་ཤེས་བསོད་ནམས་སྐྱིད་ཀྱི་མིང་ཅན་ལ།།
རིགས་ལྡན་ཁྱེའུ་ཆུ་སྤྲེལ་ལོ་པ་འབྱུང་།།
བསྟན་འགྲོར་སྨན་པའི་དགེ་མཚན་བཟང་པོ་ཤར།།
ཞེས་གསུངས་པ་ལྟར་རབ་བྱུང་ ༡༦ ཆུ་སྤྲེལ་ ༡༩༣༢ ལོའི་རྒྱལ་ཟླ་བར་ཁམས་ཕྱོགས་སྤོ་བོའི་ཡུལ་དུ་ཡབ་བསོད་ནམས་འགྱུར་མེད་དང་། ཡུམ་འཛོམས་སྐྱིད་གཉིས་ཀྱི་སྲས་སུ་མཚན་དཔེའི་པདྨོ་གསར་དུ་བཞད།
གོང་གི་ལུང་དོན་བཞིན་མཁན་ཆེན་ངག་གི་དབང་པོས་གྲུབ་དབང་སྐུ་ཕྲེང་གཉིས་པ་རིག་འཛིན་དཔལ་ཆེན་འདུས་པའི་ཡང་སྲིད་དེ་མ་ཐག་པར་ངོས་འཛིན་མཛད། དགུང་གྲངས་ལྔ་པ་ ༡༩༣༦ ལོར་དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་དུ་གདན་དྲངས།