༄༅། །མཁན་པོའི་ཕྱག་ཁྱེར།
དེ་ཡང་མཐོ་སློབ་འདིར་ཞུགས་ཏེ་འཛིན་གྲྭ་དགུའི་རིང་རྒྱ་བོད་མཁས་པའི་གཞུང་ལ་ཐོས་བསམ་མཐར་ཕྱིན་གནང་ནས་འཛིན་གྲྭ་རྫོགས་རྗེས། བསླབ་སྡོམ་དག་ཅིང་ལོ་མང་པོར་སློབ་ཁྲིད་གནང་བ་སོགས་ཉམས་མྱོང་ལེགས་པར་བསགས་པ་ཙམ་དུ་མ་ཟད། ཆོས་རྒྱལ་དྲི་མ་མེད་པའི་མདོ་ལས། ཚུལ་གནས་ཐོས་དང་ཏིང་འཛིན་གྱིས། །ལུས་གཙང་སྨྲ་མཁས་སེམས་མི་གཡོ། །སེམས་ཅན་ཀུན་ལ་བྱམས་སེམས་ལྡན། །དེ་འདྲ་བཤེས་གཉེན་དམ་པར་མཛད། །ཅེས་པ་ལྟར་གཞི་ཚུལ་ཁྲིམས་རྣམ་པར་དག་པས་ལུས་གཙང་། གཞུང་ལུགས་རབ་འབྱམས་ལ་ཐོས་བསམ་མཐར་ཕྱིན་མཛད་ཅིང་ཐོས་དོན་འཆད་པ་ལ་སྨྲ་མཁས་ལྡན་པ། ཞི་ལྷག་གི་ཏིང་ངེ་འཛིན་ལ་སྦྱངས་པ་གང་འཚམས་ཤིག་དང་ལྡན་པས་སེམས་མི་གཡོ་བ། དེ་བཞིན་དུ་སེམས་ཅན་ལ་བྱམས་སེམས་ཅན་ཏེ་ཡོན་ཏན་བཞི་དང་ལྡན་པ་ཞིག་ལ་མཁན་པོོའི་མཚན་གནས་སམ་མདོ་རྒྱུད་ངེས་དོན་བསྟན་པའི་སྣང་བྱེད་ཅེས་པའི་ཕྱག་ཁྱེར་འབུལ་བཞིན་ཡོད།
དེ་ཡང་སྤྱི་ལོ་ ༡༩༨༩ ཟླ་ ༤ ཚེས་ ༢༠ ཉིན་༧སྐྱབས་རྗེ་གྲུབ་དབང་པདྨ་ནོར་བུ་མཆོག་གིས་འདི་ནས་སྦྱངས་པ་མཐར་སོན་པ་འཇམ་དབྱངས་ཚེ་རིང་། དབང་ཕྱུག་བསོད་ནམས། བཀྲ་ཤིས་ཚེ་རིང་། ཚེ་རིང་རྡོ་རྗེ། འཇིགས་མེད་སྐལ་བཟང་སྟེ་ལྔ་ལ་མདོ་རྒྱུད་ངེས་དོན་བསྟན་པའི་སྣང་བྱེད་ཅེས་པའི་ཕྱག་ཁྱེར་གནང་།
རྣམ་གླིང་མཁན་ཐོག་དང་པོའི་མཁན་རིན་པོ་ཆེ་རྣམས་ཀྱི་སྐུ་པར།